Конфронси «Фазои саломатӣ» пешсафони соҳаи тибби Русия ва Тоҷикистонро муттаҳид намуд

Конфронси «Фазои саломатӣ» пешсафони соҳаи тибби Русия ва Тоҷикистонро муттаҳид намуд.

17 июн дар шаҳри Душанбе, дар меҳмонхонаи Crown Plaza, нахустин конфронси байналмилалии тиббии Гурӯҳи ширкатҳои МЕДСИ таҳти унвони «Фазои саломатӣ» баргузор гардид, ки ба яке аз рӯйдодҳои муҳими соҳаи тандурустии Ҷумҳурии Тоҷикистон табдил ёфт.

Конфронс мутахассисони пешқадам, коршиносони соҳаи тандурустӣ, намояндагони мақомоти давлатӣ, ҷомеаи тиббӣ, бахши соҳибкорӣ ва созмонҳои шарики Ҷумҳурии Тоҷикистон ва Федератсияи Русияро муттаҳид намуд.

Ин чорабинӣ ба майдони муколамаи касбӣ, мубодилаи таҷриба ва беҳтарин амалияҳои тиббӣ табдил ёфт. Иштирокчиён масъалаҳои марбут ба усулҳои муосири ташхис ва табобати бемориҳо, тибби пешгирикунанда, ҷорӣ намудани технологияҳои инноватсионӣ ва дурнамои рушди ҳамкориҳои байналмилалиро дар соҳаи тандурустӣ муҳокима намуданд.

Дар доираи конфронс маърӯзаҳои коршиносони пешқадами Гурӯҳи ширкатҳои МЕДСИ оид ба дастовардҳои муосир дар самтҳои ташхис, терапия, ҷарроҳӣ, кардиология, онкология, оториноларингология ва дигар бахшҳои тиб пешниҳод гардиданд.

Бо сухани ифтитоҳӣ директори тиббии ГК МЕДСИ, доктори илмҳои тиб, профессор Игор Викторович Семенякин баромад намуд. Ӯ инчунин маърӯзаҳои «Имкониятҳои тиббии МЕДСИ» ва «Ҷарроҳии сатҳи нав: амалиётҳои ҳар гуна мураккабӣ ва ҷарроҳии роботӣ»-ро пешниҳод кард.

Дар байни маърӯзачиён инҳо баромад намуданд:

• Павел Викторович Князев — мутахассиси асосӣ дар самти ташхиси ултрасадоӣ ва духтури ташхиси ултрасадоӣ ва перинаталӣ. Ӯ бо маърӯзаи «Ташхиси дақиқ: технологияҳои радиологӣ ва функсионалӣ дар амалияи клиникии МЕДСИ» баромад намуд.

• Артём Викторович Буллих — номзади илмҳои тиб ва мутахассиси самти таҳқиқоти патоморфологӣ. Мавзӯи маърӯзаи ӯ «Аз патоморфология то эндоскопия: ташхиси дақиқ ҳамчун асоси табобати инфиродӣ» буд.

• Алексей Анатольевич Бобылев — номзади илмҳои тиб, ҷарроҳ, онколог ва муовини сартабиб оид ба ҷарроҳӣ. Ӯ дар мавзӯи «Кӯмаки ҷарроҳӣ дар ҷарроҳӣ, гинекология, травматология, вертебрология ва барқарорсозӣ» баромад кард.

• Анастасия Сергеевна Мочалова — доктори илмҳои тиб ва онколог. Вай дар бораи имкониятҳои муосири хизмати онкологии МЕДСИ, аз ҷумла химиотерапия, радиотерапия ва ташхиси ПЭТ/КТ маълумот дод.

• Юрий Владимирович Талалайко — номзади илмҳои тиб, мутахассиси асосӣ дар самти оториноларингология. Мавзӯи баромади ӯ усулҳои муосири ташхис ва табобати бемориҳои ЛОР буд.

• Александр Викторович Патрикеев — номзади илмҳои тиб, кардиолог ва мутахассиси самти кардиология. Ӯ дар бораи имкониятҳои муосири ташхис, табобат ва пешгирии бемориҳои дилу рагҳо суханронӣ намуд.

• Александра Сергеевна Григорьевская — номзади илмҳои тиб, роҳбари Маркази бемориҳои дохилӣ ва табиби терапевт. Мавзӯи маърӯзаи ӯ муносибати ҳамаҷониба ба саломатии бемор, гастроэнтерология ва тибби пешгирикунанда буд.

Барои иштирокчиёни конфронс дар доираи чек-апҳои тарзи ҳаёти солим машваратҳои ройгони мутахассисон ташкил карда шуданд. Меҳмонон тавонистанд аз духтури дерматовенеролог ва трихолог Анна Брежнева, инчунин аз духтури эндокринолог ва диетолог Айнур Ҷалилова машварат гиранд.

Яке аз рӯйдодҳои муҳими конфронс ба имзо расидани меморандуми ҳамкории стратегӣ байни ҶСК «Гурӯҳи ширкатҳои МЕДСИ» ва ҶСК «Коиноти Нав» гардид. Санадро президенти ГК МЕДСИ Андрей Геннадьевич Соколов ва директори генералии ҶСК «Коиноти Нав» Илҳом Мирзо ба имзо расониданд.

Имзои созишнома нияти ҷонибҳоро барои рушди низоми муосири тандурустӣ, ҷорӣ намудани технологияҳои пешрафтаи тиббӣ ва стандартҳои байналмилалии хизматрасонии тиббӣ дар Ҷумҳурии Тоҷикистон таҳким бахшид.

Конфронси «Фазои саломатӣ» барои ҷомеаи тиббии ду кишвар рӯйдоди муҳим гардида, қадами муҳиме дар роҳи таҳкими ҳамкориҳои байналмилалӣ дар соҳаи тандурустӣ ба ҳисоб меравад.